Lev 18 | NdeIBE | STEP | UJehova wathi kuMosi,

Leviticus 18

Ukuhlangana kowesilisa lowesifazane okungekho emthethweni

1 UJehova wathi kuMosi, 2 “Tshela abako-Israyeli ukuthi: ‘Ngingu-Jehova uNkulunkulu wenu. 3 Lingabokwenza lokhu okwenziwa eGibhithe, lapho elalikhona, njalo lingabokwenza abakwenzayo ezweni laseKhenani, lapho engilisa khona. Lingalandeli abakwenzayo. 4 Lalelani imithetho yami linanzelele lilandele izimiso zami. Mina nginguJehova uNkulunkulu wenu. 5 Gcinani izimiso zami lemithetho yami, ngoba umuntu oyilalelayo uzaphila ngayo. Mina nginguJehova.

6 “ ‘Akungabi lamuntu osondela esihlotsheni sakhe esiseduze ukuthi alale laso. Mina nginguJehova.

7 “ ‘Ungatheleli uyihlo ihlazo ngokulala lonyoko. Ngunyoko; ungalali laye.

8 “ ‘Ungalali lomfazi kayihlo; lokho kuthelela uyihlo ihlazo.

9 “ ‘Ungalali lodadewenu, loba indodakazi kayihlo loba indodakazi kanyoko, kungakhathalekile ukuthi wazalelwa ekhaya loba engxenye.

10 “ ‘Ungalali lendodakazi yendodana yakho loba indodakazi yendodakazi yakho; lokhu kuzakuthelela ihlazo.

11 “ ‘Ungalali lendodakazi yomfazi kayihlo, eyazalwa nguyihlo, ingudadewenu.

12 “ ‘Ungalali lodadewabo kayihlo; uyisihlobo sikayihlo esiseduze kakhulu.

13 “ ‘Ungalali lodadewabo kanyoko, uyisihlobo sikanyoko esiseduzane kakhulu.

14 “ ‘Ungatheleli umfowabo kayihlo ihlazo ngokusondela kumkakhe ukuthi ulale laye, ngoba ungunyoko.

15 “ ‘Ungalali lomalokazana wakho, ngumfazi wendodana yakho; ungalali laye.

16 “ ‘Ungalali lomfazi womfowenu; kuzathelela umfowenu ihlazo.

17 “ ‘Ungalali lowesifazane kanye lendodakazi yakhe. Ungalali lendodakazi yendodana yakhe loba indodakazi yendodakazi yakhe; bayizihlobo zakho eziseduzane. Lokhu kuyikuxhwala.

18 “ ‘Ungathathi umfowabo womkakho ukuthi ulale laye nxa umkakho esaphila.

19 “ ‘Ungasondeli kowesifazane ukuthi ulale laye ngesikhathi engcolile ngoba esemfuleni.

20 “ ‘Ungalali lomfazi kamakhelwana wakho ngoba uyazingcolisa ngaye.

21 “ ‘Unganikeli loba nguwuphi wabantwabakho ukuthi babe ngumhlatshelo kunkulunkulu uMoleki, ngoba akufanelanga ukuthi ungcolise ibizo likaNkulunkulu wakho. Mina nginguJehova.

22 “ ‘Ungalali lendoda njengendoda ilala lomfazi; lokhu kuyisinengiso.

23 “ ‘Ungafebi lenyamazana uzingcolisa ngalokho. Owesifazana angafebi lenyamazana lokhu kuyisinengiso.

24 “ ‘Lingazingcolisi noma kungayiphi yalezizindlela, ngoba yizo izindlela izizwe engizazidudula phambi kwenu ezazingcolisa ngazo. 25 Kwaze kwangcola lelizwe; kungakho ngalijezisa ngesono salo, ilizwe labahlanza ababehlezi kulo. 26 Kodwa lina gcinani izimiso zami kanye labezizwe abaphakathi kwenu, akufanelanga benze lezizinto ezenyanyekayo,

27 ngokuba zonke lezizinto zenziwa ngabantu ababehlala kulelilizwe lina lingakafiki, ngakho ilizwe langcola. 28 Nxa lingenza amanyala kulelilizwe, lizalikhafula njengendlela elakhafula ngayo izizwe ezalandulelayo.

29 “ ‘Loba ngubani owenza lezizinto ezenyanyekayo lowo muntu kumele axotshwe ebantwini bakibo. 30 Gcinani iziqondiso zami lingalandeli izindlela zamanyala zemikhuba eyayilandelwa ngabantu abalandulelayo ngakho lingazingcolisi ngayo. Mina nginguJehova uNkulunkulu wenu.’ ”